اخرسي

مختار أنت مش عارف حاجة اصل انا منبه عليها بدل المرة مية أنها متقفش في البلكونة دي بس هى مفيهاش فايدة وكمان انا قولت ليها متروحيش مع صحابك وانا هوديك السينما بنفسي بس أزاي تسمع الكلمة فكان لازم تنضرب عشان تتأدب و تسمع الكلام وتبطل تعند معايا عشان المرة الجاية ميبقاش غلطها أكبر وتفضحنا في الحتة.
أشار مختار بنفاذ صبر
لأ انا مش معاك فده يا فهمي خلي الكلام ده على حد تاني أنما منيرة دي متربية كويس وزينة البنات كلها وتشرف اي حد.
هز فهمي رأسه بسخرية وصمت فهذا كان معتقده بشقيقته أيضا إلى أن ارتاب في شأنها لكثرة صعودها لأعلى منزلهم بحجة اطعام الدجاج وهى قبلا كانت تكره ذلك بشدة ولا تطيع والدتها حين تطلب منها ذلك وعند مراقبته لها اكتشف فاجعته فيها التي جعلته يمقتها ويمقت فعلتها الخسيسة.
استعادت شفيقة هدوئها مؤقتا حتى لا يفتضح أمر ابنتها أمام مختار وهى تعلم جيدا مدى حبه لها فهو يعشقها وطلب الارتباط بها اكثر من مرة لكن منيرة رفضت طلبه بحجة أنها لا تراه الإ كشقيق مثله مثل فهمي لكن بعد ما حدث عليها أن تسرع من إنهاء هذا الزواج قبل أن تشيع الفضائح في منطقتهم وخوفا من أن علم بها مختار ربما يتراجع عن طلبه للزواج منها وحينها سيقتلها أبنها بدون تردد فهو رجلا حر لن يقبل أن يخوض أحد في عرضه.
نجحت شفيقة برسم ابتسامة بسيطة على محياها ثم أشارت ل مختار بالأقتراب ومجاورتها على الأريكة
تعالى أقعد جاري هنا يا مختار ومتأخذناش يا حبيبي على اللي حصل ربنا يسامحها منيرة بقى لو تسمع كلمتنا من غير مناهدة مكنش جرالها ده كله.
جلس مختار بجوارها حيث أشارت له 
ولا يهمك يا عمتي بس عشان خاطري محدش فيكم عاد يزعل منيرة تاني دي لسه صغيرة وجميلة ومن حقها تدلع عليكم.
أمأت عمته وهى تربت على قدمه بحنو
حاضر يا حبيبي عشان خاطرك انت بس كلامك يمشي علينا.
أقترب فهمي پغضب وهو يجلس امامها على المقعد
ايه اللي بتقوليه ده يا أمي دا انا لازم اكسر ليها رأسها وضلوعها كمان لو فكرت تكرر اللي عملته تاني وعلى فكرة بقى البت دي لازم تتجوز وانا هوافق على العريس المتقدم ليها وهجوزه ليها ڠصب عنها.
ضجت الفرحة بداخل شفيقة بعدما أتتها الفرصة على طبق من ذهب لكي تجعل مختار يعيد طلبه مرة أخرى فبدأت في مسايرة ابنها حتى تثير خفيظته
عريس مين يا فهمي ومقولتليش ليه قبل كدا
احتقن وجه مختار بحزن فحبه ل منيرة تخطى الحدود ولن يترك أحد غيره يفوز بمحبوبته مهما كلفه الأمر فصمت وانصت لهم حتى يعلم كل شئ عن ذلك الخاطب الذي لو طالته يداه الأن لاقتلعت عنقه من جذوره.
واصل فهمي حديثه
شوقي أبن عمي محروس البقال لسه مكلمني ليلة أمبارح وانا كنت بفكر في الموضوع الأول بس خلاص انا قررت أوافق وهجوزهاله.
دبت شفيقة على صدرها بحزن
يا نادمتي ودا اسمه كلام بردو يا فهمي بقى منيرة زينة بنات الحارة تتجوز شوقي أبن محروس البقال حرام عليك يا ابني دا مهما كان جاهل ومكملش علامه أنما منيرة أسم النبي حارسها وصاينها في البكالوريا.
نظر فهمي لأمه پغضب ونهى الأمر بحدة 
أمى انا قولت كلمتي هتتجوزه يعني هتتجوزه وخلاص أنتهى وخلص اي كلام في الموضوع ده.
أعترضت شفيقة پغضب على ما قرره ثم أدارت وجهها للناحية الأخرى تغمز له بأحدى عينيها كي لا يراها مختار 
وانا قولت لأ وان كان ولابد من جوازها يبقى ابن خالها أولى بيها وهو بيحبها ورايدها من زمان قولت ايه يا مختار.
وكأن الله قد استجاب لدعائه في ليلة القدر وجعلها من نصيبه فدبت الفرحة بداخله جعلته يهلهل بسعادة غامرة 
هه بتتكلمي بجد ايوه يا عمتي أنت عارفة أن دا يوم المنى بالنسبالي.
ثم وجه حديثه ل فهمي
وانا يا فهمي مستعد اتمم جوازي منها في خلال شهر واحد وأقل كمان انا شقتي في بيت أبويا مفروشة وجاهزه

من مجميعه ٤ مطارح وصاله وصالون ومطبخ وعفشتين ميه شقة كبيرة ويرمح فيها الخيل وهجيب ليها الشبكة اللي هى تخترها وتشاور عليها بس منيرة محدش ياخدها غيري.
هز فهمي رأسه بتفكير 
تمام يا مختار انا موافق بس متشيلش نفسك اكتر من طاقتها اللي على قدك هاته ومتزنقش روحك واللي تحتاجوه بعد كدا ابقوا هاتوا بعدين.
أشار مختار له غير مصدق أنه أخيرا سيظفر بحب حياته
دا انا هجيب ليها الحلو كله دا انا بحوش لليوم دا من زمان والحمدلله مهيتي كبيرة دا غير ما بيدخلي 30 جنيه اجارات من البيت اللي ورثه عن المرحوم ابويا متقلقش الجيب عمران وخير ربنا كتير والحمدلله.
بداخل حجرتها ظلت منيرة تبكي وتلطم وجهها پقهر على ما أصابها بين ليلة وضحاها فقد استمعت لكل كلمة نطقوا بها فهي لا تحب مختار ولا تريده زوجا لها فمهما فعل ومهما امتلك سيظل فقير بالنسبة لها ولن يستطيع تلبية أحلامها معه هى تريد زوج ثري يحقق لها جميع متطلباتها من رغد العيش وذلك الحقېر نجيب بجانب وسامته التي سلبتها عقلها قد اوهمها أنه ثري ويمتلك عقار يقدر بثلاثة مليون جنيه وظنت أنه الوحيد القادر على إخراجها من ذلك المستنقع الذي تحيا فيه من وجهة نظرها فقد ظل يروى لها اكذوبة من أكاذيبه التي أعتاد أن يوقع بها السذج من الفتيات مثلها وهى أن له ارث من جده لوالده وهو عبارة منزل قديم له وحده يقع في بقعة سكنية مميزة يقدر ثمنه حاليا بثلاثة ملايين جنيه لكن وزارة الأوقاف تستحوذ عليه بعقد ايجار قديم قيمته الشهرية قليلة جدا ثلاثة جنيهات فقط وأخبرها أنه تقدم بطلب للمحكمة منذ فترة يطالبها بأخراج وزارة الأوقاف منه وانهاء عقدهم لكي ينتفع هو منه وأقنعها انه لم يتبقى سوا القليل فقط حتى يصدر حكم من المحكمة لصالحه.
انتزعت نرمين والدتها من التعمق والغوص في أمواج من رحلة ذكرياتها التي مضى عليها أكثر من ثلاثين عاما فا نرمين تكون الأبنة الصغرى ل منيرة من زوجها مختار بدخولها غرفتها بعد أن طرقت الباب عدة مرات.
طالعت نرمين والدتها بمكر وخبث 
ماما النهاردة فرح اخت صحبتي روان زي ما أنت عارفة وقولت لعادل يوصلني مرديش فا ممكن تخليه يوصلني ويبقى يرجع ياخدني بليز لانه مبيسمعش غير كلامك أنت بس.
ابتسمت لها منيرة وهى تهز رأسها 
طبعا يا قلب أمك هخليه يروح معاك يوصلك ويبقى يجيبك كمان إمال الفستان أبو الف جنيه اللي جبناه من اسبوع لزمته أيه لو مروحتيش بيه النهاردة بس انا عوزاكي تبقي فلة على سنجة عشرة وتدلعي وتتمايلي بخفة كدا وكدا فاهمة يا بت انا عايز كل الشباب في الفرح يتهبلوا عليكي عايزة طابور عرسان بس مش أي حد عرسان التعبان في حياته لأ ركزيلي على الأغنية بس عايزه عريس غني ومريش كدا ينغنغنا معاه بدل الدكتور المنيل جوز أختك غادة اللي كنت فاكره أنه يما هنا يما هناك طلع بخيل چلدة وبدل ما